Norgimiut uuliamit miliuuneeriupput

Maannalu nutaarsiassaq immaqa maani nunatsinni takorluuilersitsisinnaasoq. Norgimiup aningaasaqarnermik ilisimatuup misissueqqissaartartullu naatsorsuinermigut paasisimavaa, tunngaviusumik Norgimiu ataaseq, uuliamit gas-imillu pissamaatinit 7 miliuunit koruuninik pigisaqartoq.

Piffissamilu matumani uuliap akiata qaffasinnerujussuata kinguneranik Norgimiut ataasiakkaat pisuunerulersissimassavai. Ullumikkut uuliap akia aallaavigigutsigu, naatsorsorsinnaassavarput Norgimiut 4,7 miliuuninik amerlassuseqartut, tamarmik immikkut 7 miliuunit koruuninik pigisaqassasut.

Aningaasaqarnermik ilisimasalik Gunnar T. Torgensen aningaasaliisarfimmit Holberg-Fondene-meersoq, aviisi Dagens Næringsliv sullillugu taama naatsorsuivoq. Taassuma naatsorsuinermini Norgimi Uulianut qullersaqarfiup kisitsisaatai tunngavigalugit naatsorsuisimavoq.

- Pigisat nalitoorujussuupput, Torgensen oqarpoq, taassumalu Norgimiut kajumissaarpai uuliap akiata qaffakkiartorneranik nuannaarutiginneqqullugit, benziinap solaarillu akianik naammagittaalliorunnaarlutik.

Uagummi kalaallit? Tassami nunatta pisuussutai 57.000-iinnaalluta agguaattussaavavut, taavami siunissami qanoq pisuutigilissaqinerpugut?