Norgep imartaani uuliamik nassaartoqaqqippoq
Uuliamik ujaasinissamik akuersissuteqarfiusumi Barentshavimi nassaartoqarnerata kingorna maanna pilersaarummi Havis-imik taaguutilimmi nassaartoqarpoq.
Uuliamik nassaarfiusuni, uulia akuiarneqanngitsoq nappartat 400 aamma 600 millionit missiliussagaat, qanoq uuliaqartigineranik naliliigallarnermi oqaatigineqarpoq.
Siorna apriilimi nassaarfiusup Skrugardip kujataata kitaani 7 kilometerit missaannik ungasissulimmi Havis-imik taagorneqartumi maanna nassaartoqarpoq. Havis uuliamik ujaasinissamut akuersissuteqarfiusumut ilaavoq, nassaarfiusumili immap naqqata sannaa immikkuullarilluni.
- Nassaarfiusumi Skrugardimi uuliasiornissaq tunngavissaqarpoq. Havis-imilu nassaartoqarneratigut uuliasiornermik annertusaanissaq tunngavissarissaarnerulerpoq. Barentshavimi Norgep imartaani ujaasinissamut pilersaarutit piviusunngortileruttorpavut, Skrugardimut pilersaarummut Statoil-imi pisortaq Erik Strand Tellefsen oqarpoq.
Skrugardimi aamma Havis-imi nassaartoqarnera suliffissuaqarnikkut ineriartortitsinermut pingaaruteqassaaq, pilersuinermilu annertusaaqataassallutik. Suliffissanik nutaanik pilersitsisoqassaaq, nunallu immikkortuanut tamaanga ineriartortitseqataassallutik, Statoilip pisortaanera oqarpoq.
