Norgemut takornariat puisinniarsinnaalerput

Nunatsinni puisinniartarnermik siornagut tusaamanerlutsitsilersimaqisoq akornusiisimaqisorlu franskeq filmiliaritittartuusimasoq Brigitte Bardot nunatsinni tammajuitsussanik nannunniartitsisarnissamik pilersaaruteqarneq akerlilerlugu unitseqqullugulu Dronning Margrethemut allagaqarniariartoq, Norgemiut oqartussaasa Norgep sineriaani takornarianut puisinniartitsisalernissaq akuersissutigaat, Norgemi takornariartitsinermik aallussaqartut nuannassutigeqisaannik.

-Aallartikkattali ukiuni pingasuni utaqqisimasarput kiisami aallussinnaalerparput, Roger Eidem takornariartitseqatigiiffiup Norsafarip puisinniartitsisarniartup piginnittaa, puisinniartitsisarnissamullu akuerineqarsimasoq Norgemi aviisimut Brønnøysundimut oqarpoq.

Norsafari takornarianit puisinniarusuttunit 100-it arlaqartunit manna saaffigineqareersimavoq.

Norgemi piuisinniartitsisarnissap akuerineqarnera avatangiisinik illersuiniaqatigiiffimmi Greenpeacemi kamaatigineqaqaaq.

- Nuannariinnarlugu puisinniartitsisarnissap takutippaa

Norgep aalisarnermut ministeria Svein Ludvigsen naliliisinnaanermik amigaateqartoq, Greenpeacermiut taama isorinnipput.