- Norgemut angerlarniaritsi

Taakkua Norgep sineraani illoqarfimmut Stongfjorden-imut, Islandimiut tamaasa nuunnissaannik kaammattorpaat, naak Islandimiut katillugit 300.000-ugaluartut.

Tamannalu immikkut qanga pisumik oqaluttuassartaqarpoq. Ukioq 874 Norgemi illoqarfeeqqamit, Stongfjordenimit Ingolfur Arnarson, toqutsereernermi kingorna Islandimut qimaavoq.

Qaaqqusissummut pissutaaneruvoq, illoqarfeeqqap inuerukkaluttuinnarnera, tassami maanna pilersaarutaalersimavoq meeqqerivik aamma atuarfik matuneqartariaqassasut, meeqqat ikippallaalersimammata.

Qaqqusissutaannaanngilarli. Angutit marluk neriorsuipput, nuukkusuttoqarpat qaammatini pingasuni siullerni ineqarnerat akilerniarlugu, aammalu nuuttut illuliorusuttut toqqavissamik pisisinnaasut, islandimiut aningaasaannik 1 koruunimik akiliillutik.

- Ukiut 1136-it qaanngiussimalerput maanngaanniit aallarassili, maanna piffissanngorpoq uternissassinnut. Ilaqutariittut qaniginerpaavatsigut, suliffissaqarnissarsi ineqarnissarsilu isumannanngillat, qaaqqusissut ilaatigut taama nipeqartoq, Icenews allappoq.