Norgemiut Sumekkut filmiliarineqarnerannut tapiisut
Nordnorsk Filmcenterip, Saamit Norgellu avannaamiut kulturiannik tapersersuisuusup, Inuk Silis Høeghip Emile Peronardillu filmiliaannut, "The Story of Sume"-mik taaguutilimmut, norgemiut aningaasaannik 100.000 koruuninik immikkut ittumik tapiinissani aalajangiussimavaa. Filmip taassuma Kalaallit Nunaanni ukiaru takuteqqaarneqarnissaa naatsorsuutigineqarpoq.
Nordnorsk Filmcenterip tunngavilersuutitut nassuiaatigaa, Sumekkut oqaluttuassartaat nipilersukkanut taamaallaat tunnganngimmat, aammali Kalaallit Nunaata namminersulerniarluni ilungersuuteqarneranut, kalaallillu siunissami namminiilerusunnerannut tunngalluinnartuusoq.
- Filmi 2014-imi saqqummersuni anginersaasinnaavoq, Kalaallillu Nunaat nunanit tamanit maluginiarneqalissaaq, filmiliortartoq norgemiu, filmiliortitseqatigiiffimmit Jabfilmimeersoq, John Arvid Berger, oqarpoq. Filmiliortitseqatigiiffik taanna Sumekkut pillugit filmiliami aamma suleqataavoq.
Inuk Silis Høegh Emile Peronardilu maannakkorpiaq Københavnimi inimi qiortaasarfimmiipput, filmip piviusunngortinnissaa taamaalillutik aallartillugu.
Sumekkut pillugit filmimi rockimik nipilersortartut taakku atugaannik qanganisaanerusunik nutaaliaanerusunillu imaqarpoq, nuussuarlu kalaallinit nipilersortartunit saqqummersinneqartoq siullerpaaq 1973-imi saqqummersinneqarmat, siulleq nipilersoriaaseq taanna ukiuni taakkunani pisartuni nutaamik aallartitsivoq. Nuussuaq taanna Europami tamarmi maluginiarneqarpoq.
