Norgemiut marluk Congomi eqqartuussivimmi toqumut pillagaapput

Norgemiut Joshua French aamma Tjostolv Moland Congomi Kingasani-mi sakkutuut eqqartuussivianni toqumut pillagaapput. Tjostolv Moland, 28-nik ukioqartoq kilitsissiatut sulisutut, toqutsisutut, toqutseriarsimasutut kiisalu sakkoqarluni tillinniartutut, inatsisinillu unioqqutitsilluni sakkoqartutut pinerlunniatullu unnerluunneqarluni toqumut pillagaavoq.
Allattoq Oline I. Olsen
septembarip 08-at 2009 10:34

Joshua French 27-nik ukiulik kilitsissiatut sulisutut, toqutseqataasutut sakkulersorlunilu tillinniatut pinerluttutullu unnerluunneqarluni toqumut aamma pillagaavoq.

Eqqartuussinermi Norge aamma akiligassinneqarpoq, tassa 60 millionit dolarsinik Congomut akiligassinneqarami, Norgemiulli akiliiumanatik nalunaaruteqareerput.

Unnerluunneqartunut illersuisup André Kibambep eqqartuussivimmi toqumut pillaaneq suliassanngorteqqinniarpaa.

Unnerluunneqartut French aamma Moland pisuunngitsutut eqqartuussinerup nalaani oqaaseqartuarput. Biilinik aquttumik Abide Kasongo-mik toqutsisimasutut unnerluunneqarput. Akerlianilli norgemiut taakku marluk oqarput, pinerliiniaqatigiit saassussinerisigut Abide Kasongo toqunneqartoq.

Norgemiut nunanut allanut ministeriaaneersoq eqqartuussinermi malinnaavoq, toqumullu pillagaasut nivinngarneqarlutik toqutaalissagaluarpata akuliuffigissavai.

- Pisortaqarfiit saaffigissavagut toqutsinissarlu pinngitsoortinnissaa piumasaralutigut, Norgemi nunanut allanut ministeeriaqarfik nalunaarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq