Norgemiut kapisiliutaat piumanngilaat
Eqqissinermut Nobelip nersornaasiuttagaa kinamiumut Liu Xiaobomut tunniunneqarmalli Kinap Norgellu saqitsaannerat ilimaginngisamik nuannersumik kinguneqarpoq: saqitsaannermi kapisilinnut Skotlandimeersunut iluaqutaavoq.
Norgemiut kinamiunit pillarneqarput, kapisillimmi Kina tamakkerlugu nerineqartartut 90 procentii Norgemit tunisassiaasartut, aviisimi naalagaaffimmit tapersersorneqartumi, Global Timesimi, naatsorsuinerit takutippaat. Tamanna aviisimi The Daily Telegraphimi allaaserineqarpoq.
Nobelimik nersornaasiisartut Oslomi aalajangiisartuisa oktobarimi nalunaarutigaat, eqqisseqatigiinnissamut nersornaat Kinami nunap naalakkersugaaneranik isornartorsiuisartumut, Liu Xiaobomut, tunniunneqartoq, Liu Xiaobo demokratiimut illersuisuunini pissutigalugu Kinami oqartussaasunit ukiuni aqqanilinni parnaarussassanngortinneqarsimavoq. Taamanimiilli Kina Norgemit iluarineqarunnaarpoq.
Beijingip Oslollu politikkikkut ataatsimeeqatigiinnissaat tamarmik taamanimiilli taamaatiinnarneqarput, kapisillillu Norgemeersut Kinami akitsuuserivikkoortuartaraluartut uninngatiinnarneqartariaqartalerput, tassami pappialat immersugassat assigiinngitsut iluarsinissaat ilanngaaserisut utaqqerujussuartariaqartarmatigik.
- Aalisakkanik Kinamut eqqussisinnaajunnaavippugut, Henning Beltestad, Norgemi Lerøey Seafoodimeersoq, nassuerpoq.