Norgemiut arfattassatik tamakkinngilaat

Norgemiut arfanniartartuisa ukioq manna tikaagullittassamik affaat kisiisa pisarissallugit angumersisinnaasut, tuluit aviisiat The Guardian allappoq.

Norgemiut ukioq manna arfattassatik amerlanaangaatsiarsimagaluarpaat; arfanniat 1.052-inik tikaagullinnissaminnik akuerineqarsimapput, maannamulli taakku affaasa missaat, tassa 500-t, kisiisa pisarisimavaat. Ukioq arfanniarfiusoq qaammatip uuma naanerani naasussaammat, sinneruttut pisarineqarnissaat ilimagineqanngilaq.

Arfattarisimasat taama ikitsiginerannut silarluttarnera peqqutaasimasoq uuliallu akisunerujussuata kingunerisaanik arfanniutit aallanngitsuuittarsimasut Norgemi naalakkersuisut nalunaarput.

Avatangiisinik uumasunillu illersuiniaqatigiit allarluinnarmik nassuiaatissaqartitsipput; taakku norgemiut mamarisaat allanngorsimanerarpaat.

- Arferup neqaanik nerisartut ikiliartulersimapput, Norgemi Greenpeacep oqaaseqatartua oqarpoq.

Norge nunarsuami kisiartaalluni aningaasarsiutigalugu arfanniartarfiuvoq. 1993-imi aningaasarsiutigalugu arfanniartarneq Norgemi akuersissutigineqarpoq.