Norgemiu nersornaasigaavoq

Kalaaleq atuakkiortoq Niviaq Korneliussen Nunat Avannarliit Siunnersuisoqatigiivisa atuakkiortumut nersornaasiuttagaanik nersornaaserneqanngilaq.

Nersornaaserneqartoq tassaavoq Norgemiu Jon Fosse. Taassuma atuakkiani pingasuni nangeqattaartoq "Andvake. Olavs draumar. Kveldsvævd." nersorneqaatigaa.

Reykjavikimi nersornaasiisoqaqqammerpoq, atuakkiortut 14-it tassani innersuunneqarsimallutik. Nersornaat 350.000 koruuninik aningaasartaqarpoq.

Aamma atuaruk Atuakkiortunut nersornaasiuttagaq kalaallimut?

Niviaq Korneliussenip atuakkiaqqaatini "Homo Sapienne" pillugu nersornaaserneqartussatut innersuunneqartunut ilaagaluarpoq. Atuakkiaq taanna atuakkianut tunngasunik allaaserinnittartunit nersorneqartorujussuuvoq, aamma Nunatta avataani.

Niviaq Korneliussen Nanortalimmi 1990-imi inunngorpoq. Inuiaqatigiilerinermik Nuummi Ilisimatusarfimmi ukiualunni ilisimatusareerluni tarnip pissusiinut tunngasunik Aarhusip Universitetiani maanna ilinniarpoq.

Niviaq Korneliussen 2012-imi oqaluttualiaaqqanik unammisitsinermi "Allatta"-mi peqataavoq, oqaluttuaraliaalu "San Francisco" taamanikkut ajugaalluni. Taanna atuakkiami "Inuusuttut - Nunatsinni Nunarsuarmilu" saqqummersinneqarpoq.

Nunat Avannarliit Siunnersuisoqatigiivisa atuakkiortumut nersornaasiuttagaata saniatigut meeqqanut inuusuttunullu atuakkianut nersornaat tunniunneqarpoq, Naja Rosing-Asvidillu atuakkiaa "Aqipi aasivimmiittoq" nunarput sinnerlugu innersuussanut ilaalluni.

Matumanili nersornaaserneqartoq tassaavoq Jakob Wegelius Sverigemeersoq. Taassuma atuakkiani "Mördarens apa" nersorneqaatigaa.