Arctic Circle Norgemit Saamit: Nunavut ilinniarfigisinnaavarput

Saamillu issittumi inuit allat qanoq politikkikkut sunniuteqarnerusinnaanermik ilinniartissinnaavaat.

Aili Keskitalo Norgemi Saamit inatsisartuini siulittaasuuvoq, peqataasullu 350-it allat nunanit 20-neersut peqatigalugit Arctic Circle Greenland Forumimut maanna Nuummi ingerlanneqartumi peqataalluni.

Aatsitassarsiorneq sammivaat

Issittumilu inuit aatsitassarsiorneq pillugu suliffissuit eqqarsaatigalugit assigiimmik unammilligassaqartartut ataatsimeersuarnermi maluginiarsimavaa. Taassuma tunngatillugu Saamit Nunavumiunit ilikkagaqarsinnaasut Aili Keskitalo oqarpoq:

- Nunavut pillugu tunngasunik tiguartissimavunga. Issittumi aatsitassarsiortoqaraangat qulakkeerniartassavarput iluanaarutit nunarsuaq tamakkerlugu siaruarternatik iluaqutissat iluamik agguaanneqartassasut, taamaalilluni aatsitassarsiorfiit inuusuttatsinnik sulisoqarnissartik, ilinniartitsinissartik qanorlu aatsitassarsiornermik iluanaarsinnaanerannik ilitsersuutissallugit pisussaaffigilissavaat, taamaalillutami aatsitassaaruppat akisunaarinissarput avaqqunniarsinnaagatsigu, Aili Keskitalo oqarpoq.

- Maligassaqqissut tamakku pisariaqartippagut, nunatsinnimi Saamit nunaanni taamatut ingerlannginnatta.

Saamit politikkimut tunngasunik ilisimasaqarluartut

Illuatungaanilu Norgemi Saamit inatsisartuisa siulittaasuat isumaqarpoq allat politikkikkut sunniilluarsinnaanissamik saamik ilikkarfigisinnaagaat. Tamannami pikkoriffigaarput - politikkimullu tunngasunik ilisimasaqarluarpugut, oqarpoq. Taamaattumillu immitsinnut ilinniarfigissaagut:

- Issittumi unammilligassat qanoq assigiitsiginerat paasisimavara. Taamaattumillu ilinniarfigeqatigiinnissarput pingaaruteqarpoq, Norgemi Saamit inatsisartuisa siulittaasuat Aili Keskitalo oqarpoq.