Norgemi unnummut eqqaaniaaneq

Norgemi ministeriuneq Jens Stoltenberg, Oslomi inunnut tuusintilippassuarnut unnummut oqalugiarpoq, tamaani Norgemiut illoqarfinni allanisulli tallimanngormat toqoraasoqarnerani toqutaasut eqqaaniarlugit ruusanik ikumatitanillu tigumiarlutik katersuusimatillugit.
Allattoq Elisa Isaksen
juulip 25-at 2011 16:07

Reutersimit oqaatigineqarpoq, inuit Oslomi katersuuttut politiinit 100.000-iunerarneqartut.

- Ingerlaaqatigiinneq manna annerpaallunilu pingaarnerpaasinnaavoq. Ingerlaaqatigiinnermi pingaartinneqarlutik inuinnaat oqartussaaqataanerat, ataqatigiinneq aamma akaareqatigiinneq, ministeriuneq oqarpoq.

Talerperliuniap Anders Behring Breivikip Oslomi qaartartumeerinermigut qeqertamilu Utøyami 76-inik toqoraaneratigut Norge susinnaajunnaarsinneqanngitsoq, ministeriunerup oqalugiaatimini aallarniutigalugu oqaatigaa.

Aamma oqaatigaa, nikorfaffimminit Norgemi inuppassuit piumassuseqartut takusinnaagini. Tassa Norgemiut qassinilluunniit ukuioqaraluartut ruusamik tigumiartut takusinnaagamigit.

- Ajussutsip inuk ataaseq toqussinnaavaa, inuiaqatigiilli tamaasa ajugaaffigisinnaanagit, Stoltenberg oqarpoq.