Norgemi toqutaasut ikinnerpaamik 92-iupput

Norgemi illoqarfiit pingaarnersaanni Oslomi ippassaq qaartartumeerisoqarmat, Sulisartullu Partiiata inuusuttaasa qeqertami Utøyami, Oslop avatinguaniittumi tammaarsimaarfianni eqqaassisoqarmat, inuit ikinnerpaamik 92-it toqutaapput.
Allattoq Mads Lynge
juulip 23-at 2011 11:30

Nunatta ippassaq nalunaaqutaa malillugu ulloqeqqanut tanneq sisamanngortorlu, Norgemi Naalakkersuisut qitiusoqarfianni, Oslop qiterpasissuaniittumi qaartartoq qaartinneqarpoq, illorsuit arlallit aseruatiterneqarlutik, taakkununnga ilaalluni Norgep ministeriunerata, Jens Stoltenbergip allaffeqarfissua.

Angut 32-nik ukiulik, Anders Behring Breivik, politiinit tigusarineqarpoq pasineqarlunilu. Peqqarniisaarnianut Norgemiut inatsisaat tunngavigalugu angut taanna eqqartuussivimmut sassartinneqarumaartoq nalunaarutigineqarpoq.

Anders Behring Breivik, talerperliunianik tapersersuisutut ilisimaneqarpoq  islamisiortunillu isornartorsiuisut nittartakkatigut oqallittarfianni akuusarsimalluni.

Angut taanna poltiitut atukkersorsimallunilu aallaasilisarlunilu qeqertami Utøyami eqqissiivilluni pisuttoq, tv-qarfiup NRK-p assilisimagaa takuneqarsinnaavoq.
Inuusuttut toqungasut timaasa akornanni qeqertaaqqap sineriaani eqqissiivilluni pisuppoq, inuillu aallaasarsimallugit.

Norgemi pisimasut tunngavigalugit misiginneqatiginnissutit imaaginnavipput. Naalakkersuisut siulittaasuata Kuupik Kleistip Siumullu Inuussuttunut Suleqatigiiffiata Norgemiunut misiginneqatiginninnertik apuuppaat.

USA-p præsidentia Barack Obama aamma Naalagaaffiit Peqatigiit qullersaata Ban Ki-moonip saassussinerit assuaraat.
- Naalagaaffiit Peqatigiit Norgemiut misiginneqatiglluinnarpaat , pisut alianaqaat, Norgemilu innuttaasut misiginneqatigaavut, Ban Ki-moon oqarpoq.

Qeqertami Utøyami pisut tunngavigalugit ullumi ullup ingerlanerani oqartoqaraluarpoq aallaasersortut marluusimasut, soorlu pisumik takunnissimasut taama oqaraluartut.
Norgemili politiit nalunaarutigaat taamaattoqarsimasinnaanissaanik takussutissaqanngitsoq.