Norgemi qinersineq naammassisoq

Arbeiderpartiet, Senterpartiet, Sosialistisk Venstrepartilu pingasuullutik 89-inik inatsisartuni issiatitaqalerlutik amerlanerussuteqalersut Norgemi qinersinerup inernerata takutippaa.

Norgemi tusagassiuutit ilaat, VG, qinersinerup inerneranik taama takussutissiivoq.

Norgemi inatsisartuni inissat katillulgit 169-iupput, amerlanerussuteqarniaraannili ikinnerpaamik 85-iusariaqarput.

Taamaasilluni Arbeiderpartineersoq, Jonas Gahr, maanna Norgemi ministeriuninngorpoq.

Taassuma amerlanerussuteqarnissartik angorusulluinnarlugu angugaa, DR-ip europami ilanngutassiisartuat, Anna Gaarslev oqarpoq.

- Inatsisartuni amerlanerussuteqarnissartik takorluugaralugu Jonas Gahrip oqariartuutiginikuuaa, maannalu tassa qinersinerup takutippaa tamanna angugaa.

Maanna isumaqatiginninniarnerit aallartipput, isumaqatiginninniarnermi ullormut oqaluuserisassat Anna Garslevip ima tulleriaarpai.

- Partiinni pingaarnertut eqqartugassat tassaapput, uuliasiorneq, silap pissusia, mingutsitsinngitsunik atuinissaq, akileraartarnermut aaqqissuusseqqinneq naligiimmillu atugarissaarnissaq.

Taassuma Erna Solberg partii Høyremeersoq 2013-imili ministeriunerusimasoq taarserpaa.

Millionæriusoq

Taamaasinerani partii talerpilliit 64-nik issiasuutitaqaanalerlutik kinguangaatsiarnissaanik missingersuusiortoqarpoq.

"Innuttaasut" pillugit Støre qineqqusaaruteqarpoq, taamaattorli nammineq millionæriulluni, qinersartunut amerlanerussuteqartunut soqutigisaqaqateqarpallaarani.

- Aningaasaqarnera nalinginnaasuunngilaq, taamaattorli uannut tunngasorpassuit nalinginnaasuupput, qineqqusaarnermini oqarpoq, Norgemi aningaasatigut naligiinnginneq pillugu oqaaseqarami. 

Partii talerpilliit Norgemi naalakkersuisuuneranni milliardærit marloriaatinngorsimapput.

Pissaaneqarniuunneq metoo-skandaler

Qinersinerup allartinnginnerani isumasiunerup takutippaa Arbeiderpartiet ilimagisamiit ingerlalluarnerussasoq.

Qinersinerup inernera malillugu statsministeri konservativemeersoq, Erna Solberg, qangalili ilimageriikkaminik ajorsangaatsiarpoq.

Arbeiderpartiet metoomut kusanaatsulianut, inuit akornanni isumaqatigiinnginnernut partiillu iluani isumaqatigiinnginnernut aqqusaagaqaqqammersoq, Størep qineqqusaarnerni oqaatigillattaasimavaa.

Arbeiderpartiet-mut tapersersorteqangaatsiarpoq, tassami 2001-mi qinersinermi aatsaat taama tapersersortikitsigimmat.