Norgemi partii Fremskrittspartiet Norgemi naalakkersuisoqatigiinnit anisoq

Norgep ministeriunera, Erna Solberg, Fremskrittspartiet Norgemi naalakkersuisoqatigiinnit anereersorlu ikinnerussuteqarlutik naalakkersuisuulersunut siulittaasuuginnassaaq.
Norgemi naalakkersuisoqatigiinni partiit massakkut tassaalerput Høyre, Venstre kiisalu Kristelig Folkeparti. Assi © : Fredrik Varfjell/NTB/Ritzau Scanpix
Allattoq Ritzau
januaarip 20-at 2020 14:43
Nutserisoq Mads Lynge

Norgemi partii Fremskrittspartiet (FrP) Norgemi naalakkersuisoqatigiinnit anivoq.

Partiip siulittaasuata, Siv Jensenip, Norgep statsministeria Erna Solberg partiii Høyremeersoq, ataatsimeeqatigereerlugu, tamanna nalunaarutigaa.

Arnap 29-nik ukiullip Norgemiup, Pakistanimit kingoqqisup, taassumallu meeraasa marluk Syriamit Norgemut uteqqissinnaanissaat Norgemi oqartussat aalajangereeraallu, Erna Solberg ataatsimeeqatigaat.

Fremskrittspartiip, nunanit allanit nunasinianik isorinnittup, arnap Norgemut uteqqissinnaanissaa akerleraa.

- Fremskrittspartiip tamanna pillugu naalakkersuisoqatigiinni ilaasortaaginnarnissaanut pissutissaqarunnaartoq nalilerparput, Siv Jensen oqarpoq. Nutaarsiassaqartitsivik NRK taama allaaserisaqarpoq.

Erna Solbergilli statsministeriuinnarnissaa Fremskrittspartiip kissaatigigaa, Siv Jensenip erseqqissaatigaa.

- Erna Solbergip nunatsinnik siunissami aqutsisuuginnarnissaa aalajangiusimavarput, FrP oqarpoq.

Arnaq 29-nik ukiulik Norgemut tallimanngormat unnukkut tikippoq, politiiniillu ingerlaannaq tigusarineqarluni. Taanna sapaatip-akunnerini sisamani ullumi ataasinngornermi tigummigallagassanngortinneqarpoq.

Arnap meeraasa Syriamit Norgemut angerlartinneqarsinnaanissaannut periarfissat, Norgemi nunanut allanut tunngasunut ministereqarfiup misissorsimagaa, Erna Solbergip oqaatigaa.

Tamannali piviusunngorsinnaanngitsoq, Erna Solberg oqarpoq.

- Taava akunnattoorfeqalerpugut, tamarmik angerlartinneqarnissaat, taavaniiginnartinneqarnissaalluunniit periarfissatuaalerluni. Tamanna arnap erneranut tallimanik ukiulimmut napparsimasumullu ajornartorsiutaalissasoq ilisimavarput, Erna Solberg oqarpoq.

Norgemi naalakkersuisoqatigiinni partiit massakkut tassaalerput Høyre, Venstre kiisalu Kristelig Folkeparti.