Norgemi nannut naatsorsorneqartut

januaarip 16-at 2005 17:44

Nannut qassiunersut paasiniarlugit Norske Polar Instituttianit Norgep issittortaata ilaani misissueqqissaarnerit qaammatialunni ingerlanneqarsimapput.

Misissueqqissaarnerit maannamut takutippaat nannut 2.000-it 5.000 akornanni norgep issittortaanittut. Norgemilu naalakkersuisut kisitsisit eqqoqqissaartut misissuisunit piumsarisimavaat.

Taamaalillutik nannut pillugit ilisimatusartunit russit norgellu nanui Svalbardip Franz Josef Landillu akornanni katersuuffeqartartut, timmisartumik akunnerit 200 atorlugit kisitseqqissaarneqarsimapput. Paasineqarsimavoq norgemi nannut 3.000-iusut, allanullu naleqqiullugit amerlangaatsiartut. Nannut issittumiittut 25.000-inut missiliorneqarput.

Norgemi avatangiisinut ministerip ilisimatuut kisitsisimanerat aallaavigalugu Aftenpostenimut oqarpoq qaninnerusoq eqqarsaatigalugu nannut nungutaanissamik ulorianartorsiunngitsut, taamaattorli silaannaap allanngoriartorneratigut mingutsinermillu ikileriaateqarnissaat ernumanartoqartoq.

Norgemi avatangiisinut ministeri ilisimatuullu ernummatigaat sermip aanneratigut nannut nerisassarsiorsinnaajunaarnissaat.