Isumasiuinerni eqqoriarneqarpoq Arbeiderparti ullumikkut qinersinermi 34,8 procentinit taaguunneqassasoq, tassa 4 procentimik siuariassallutik. Isumasiuinerit malillugit Fremskrittparti kinguariarujussuassaaq.
Isumasiuinerit Norgimi naalakkersuisunut qorsunnut-aappaluttunut, Jens Stoltenbergimit siuttuuffigineqartunut oqiliallannaqaat.
Isumasiuinerit eqquutissappata naalakkersuisoqatigiit, Arbeiderpartiet, Socialistisk Venstreparti aamma Senterparti, Stortingimi inissanit 169-iusunit 88-it pissavaat, illuatungiliuttunullu inissat 81-it sinnerutissallutik.
Isumasiuinerit ulloq qinersivik eqqorlugu aviisimit Dagens Næringslivimit saqqummiunneqarput.