Norgemi melodi grand prixertoqarnerani saamit ajugaasut
Naak Julie Berthelsen Nina Kreutzmannilu danskit Melodi Grand Prix-rneranni iluatsinngikkaluartut, saamit nipilersoqatigiit "Keiino" Norgep avannaanit Kautokeinomeersut iluatsinnerupput.
Taakkumi norskit Melodi Grand Prixeranni sapaatip akunnerata naanerani pisumi ajugaagamik.
Erinarsuut atugaat "Spirit in the Sky"-mik ateqarpoq.
AAMMA ATUARUK Julie Ninalu Melodi Grand Priximi 2-nngorput
Tassanilu saamit kulturikkut ilisarnaataasa ilaat joikerneq aamma atorneqarpoq. Rappertartoq Fred Buljo joikerluni akunniliimmat. Meeraallunili kingullermik joikersimalluni, taassuma oqaatigaa:
- Annilaangaqaanga, tassami joikerluni misigissutsikkut attortisimanartarmat. Kisianni nuanneqaaq, Fred Buljo oqarpoq.
Ajugaasut Melodi Grand Priximut Israelimi Tel Avivimi maajimi pisussamut peqataasussanngorput.
