Norgemi kiatsipiloormat nuna sisoorpoq

Norgep avannarpasissuani illoqarfiit Narvik-ip Beisfeld-illu qanitaani nuna sisoortorsuanngormat innuttaasut oqartussanit qimagutitinneqarput.
Allattoq Najaaraq Egede
maajip 16-at 2010 13:48

Nunap sisoornera sanimut 100 meterinik silitsigisoq inuup inuuneranik akeqarsimassangatinneqanngilaq, allanili nunap sisoortoqarnissaa ernumanarmat sisoorfiusinnaasut qanitaanni najugallit qimarngupput.

- Maannamut inunnik ajoqusertoqarsimarpasinngilaq, Norgep avannaani annaassiniartartut sinnerlugit Irene Skaue nutaarsiassaqartitsivimmut NTB-mut oqarpoq.

Apussuup sermitarasaartup sisoornermini issoq ujaqqallu nassatarimmagit illut illuaqqalluunniit ajoqusersimanngikkai aamma oqaatigineqarpoq. Ajoqusertoqarsimannginnera qulakkeerniarlugu maanna qimmit narajorlutik inunnik ujarlertartut ujaasitinneqarput.

Norgep avannarpasissuani upernalernerani aput sukkasoorujussuarmik aakkiartortoq nunap sisoorneranut pissutaasorineqarpoq.

- Ullup unnuallu ingerlanerinnaani ukiumiit aasamut ikaarsaarpugut, tamannalu qaqqanit erngup kuussualerneranut pissutaavoq, Norgemi aqqusinernik nakkutilliisoqarfimmeersoq Jo-André Karlberg oqarpoq.