Norgemi ilisimatooq peqquserlussimavoq

Norgemi ilisimatuut tatiginassusaat milleriarujussuarpoq.

Ilisimatooq norgemiu ilisimatusarnermi peqquserluuteqarsimasutut pasineqarpoq.

Suliaq Oslomi Ilisimatusarfimmi, UiO-mi, aamma Avatangiisit Pinngortitarlu pillugit Ilisimatusarfimmi, UMB-mi, misissuivigineqarpoq.

Ilisimatooq Oslop kujataatungaani illoqarfimmi Åsimi Avatangiisit Pinngortitarlu pillugit Ilisimatusarfimmi, UMB-mi, ukiuni qulingiluani sulisimavoq. Peqquserlussimaneralu tassani aamma paasineqarpoq.

- Nalunaarsuutinik tatiginanngitsunik naammattoorsivugut, aviisimullu ilisimatuut pisartagaannut ilanngutassaraluarput taamaatiinnartariaqarsimavarput, UMB-mi rektori, Knut Hove, oqarpoq.

Peqquserluuteqarsimasutut pasisaq pinngortitami pissuseqatigiinnermut, tassa økologiimut, ilisimatuujuvoq, ilaatigut nunani kiattuni pupinnut.

Nappaassuaq kræfti pillugu Norgemi ilisimatusarneq siorna juullip qaammataani tusagaanerluppoq, norgemiut ilisimatuut tupaatigeqisaannik. Tassa kræfteqartunut Norgemi nakorsaq ilisimaarineqarluartoq, ilisimatooq, Jon Sudbø, nassuermat, ilisimatusarnermi inernera, nakorsat atuagassiaanni tusaamasami, The Lancetimi, saqqummersinneqarsimasoq, aallaqaataaniit naggataanut piumasaarsuutaasimasoq, kisitsisillu tamarmik ilumoorsimanngilluinnartut.