Norgemi coronavirusimik tunillatsittut 15-nut amerlipput

Norgemi peqqissutsimut aqutsisoqarfik arfininngornermi taama paasissutissiivoq.

Ullup unnuallu ataatsip ingerlanerani coronavirusimik tunillatsissimasut marloriaatinngorsimapput.

Tallimanngornermi nalunaarutigineqarpoq Norgemi inuit arfineq marluk tunillatsissimasut, inuit allat arfineq pingasut tunillatsissimasut arfininngornermi nalunaarutigineqarlutik.

Tunillatsissimasuni pingasut Oslomi napparsimmavissuarmi Universitethospitalimi atorfeqarput.

Norgemi peqqussutsimut aqutsisoqarfik Folkehelseinstitutet tusagassiuutinut nalunaaruteqarluni taama allappoq.

- Norgemi peqqissutsimut aqutsisoqarfiup ilisimavaa, Norgemi tunillatsisimasut 15-it sumi tunillatsisimanersut. Tunillatsissimasut tamarmik tunillaassuuffiusunut attuumassuteqarsimapput.

Peqqissutsimut aqutsisoqarfik peqqinnissaqarfinni sulisunut arfininngornermi erseqqissaateqarput, tassalu sumiiffinni tunillaassuuffioreernermi iliuusissanik.

- Peqqinnissaqarfimmi sulisut napparsimatillutik suliartortassanngillat, napparsimallutillu uninngasut tunillannginnissaannut tunngaviusumik periusissat malissallugit, Peqqissutsimut aqutsisoqarfimmi pisortaq Geir Bukholm taama oqarpoq.

Skandinaviami corona virusimik tunillatsissimasuni Norgemi amerlanersaapput.

Sverigemi inuit aqqaneq marluk tunillatsisimasut uppernarsarneqarpoq, Danmarkimi Finlandimilu inuit pingasut tunillatsissimallutik.

Islandimi inummik  ataatsimik  nualluummik coronavirusimik tunillatsittoqarsimavoq.