Norgemi assagiarsussuaq nungutinniarneqarpoq
Immikkoortoqarfiullu suliniutini angussappagu Norgemi aalisarnikkut isertitsiffiunerpaasartoq atuukkunnaassaaq.
- Uumassusillit avataanit eqqunneqarsimasut tamaasa Norgep imartaaniittut, taakkununnga ilaalluni assagiarsussuaq, nungusarniarpavut. Imaani uumassusilinnik eqqussinerit ajunngitsumik kinguneqartarnerannik, ataasinnguamilluunniit assersuutissaqangilaq, imaani uumassusilimmut biologeq Pinngortitaq pillugu Suliniaqatigiiffimmeersoq Nina Jensen taama oqarpoq.
Pinngortitaq pillugu nunarsuaq tamakkerlugu Suliniaqatigiiffissuaq WWF isumaqarpoq Norgemi naalakkersuisut killormorluinnaq iliuuseqartut assagiarsussuit amerlisarnerisigut sumiiffiillu ilaanni pisassat killilersornerisigut.
Assagiarsussuaq Kongekrabbe-mik taaguutilik Manerassuarmi uumasuuvoq, 1961-milu Ruslandimi Kola-mut Murmanskimullu siullermeerluni ilisimatuumit Kurij Orlov-imit eqqunneqarluni. Taamanikkut pilersaarutaasimavoq aalisartut naleqarnerusunik piniagassaqarnissaat.
- Norgemi aalisarnikkut inuussutissarsiutit pingaarnersaat taama pineqarsinnaanngillat. Assagiarsussuit aalisakkat suffiffiini katersuuttalernissaat suannillu nerisaqalernissaat ernummatigaarput, Nina Jensen oqarpoq.
Assagiarsussuup niui qerisut, kilumut 250 koruunilerlugit, Danmarkimi aalisagaarniarfinni pisiarineqarsinnaapput.
