Norge-miup kalaallit siulini ujarpai

Isiginnaartitsisartoqatigiit Silamiukkut isiginnaartitsisusiaanni Ukalitsiami isiginnaartitseqataasussat ilagaat 22-inik ukiulik Tormod Karlsen Norge-mioq.

Norge-minngaanniit nunatsinnukarnermini neriuutigaa ilaqutariinni aallavitsik nassaariumaarlugu.

Tormod Karlsen-ip aataa Michael kalaaliuvoq, tamanalu nalunngittuaannarsimavaa. Tormod-ip aataava Michael ukioq 1922-imi København-imiit Norge-iliarsimavoq taamani Tormod-ip aataava 17-inik ukioqartoq. Michael 1905-imi inuusimavoq.

Norge-mut nunasigami ilaqutattaarpoq, atini allanngortillugu, niivertarfiutitaarlunilu. Michael panissaarpoq, taannaavorlu Tormod-ip anaanaa. Michael-ip kalaalliunera kalaallit nunaanninngaaneersuuneralu angerlarsimaffimmi nipituumik oqaluuserineqarneq ajorpoq. Kaffisortitsisarnerit Michael-ip ileqqutoqqatut attatiinnarsimavai, kaffisortitsinerillu avataatigut, Tormod-ip arnaatalu naluaat Michael kalaallit nunanni suminngaaneersuunersoq. Michael ukioq 1988 toquvoq ernutaa Tormod taamani sisamanik ukioqartoq, mannalu tikillugu paasineqanngilaq Michael kalaaleq, kalaallit nunaanni suminngaaneersuunersoq.

Tormod isiginnaartitsisartuuvoq, siornalu isiginnaartitsisartoqatigiit Silamiut qarasaasiakkut nittartagaatigut nassaarigamigit allaffigisimavai attavigalugillu, tassalu isiginnaartitsissuami Ukaliatsiami inuttat pingaarnerit ilaattut isiginnaartitseqataassaaq, taassumalugooq saniatigut neriuutigaa, kalaallit nunaanni inuit arlaata siulimi ukioq 1920-imi norgemut aallartoq eqqaamasinnaassagaa, taamaalilluni ilaquttani aallavinilu nassaarissagaluaramigit.