Norge: Kongsberg-imi pasisaq sapaatip akunnerini sisamani tigummigallagaassaaq
Kongsberg-imi saassusisutut pasineqartoq sapaatip akunnerini sisamani tigummigallagaassanngotinneqarpoq.
Angut, 37-nik ukiulik Espen Andersen Bråthen sapaatip akunnerini marlunni kisimiitillugu mattusimaneqassaaq.
Politiit marloriarlugu Bråthen killisioreerlugu killisiorneqaqqissanngitsoq oqaatigaat. Pasineqartoq peqqinnissaqarfimmit nakkutigineqarpoq.
Politiadvokat-ip Anne Irén Svane Mathiassen-ip tamanna Norge-mi tusagassiorfeqarfimmut NTB-mut tallimanngormat nalunaarutigaa.
Eqqartuussissuserisoq illersortaasoq Fredrik Neumann naapertorlugu, 37-nik ukiullip, ingasaassinianut attaveqarnikup, tamakkiisumik tarnikkut misissorneqarnissaa aalajangiunneqarpoq.
- Pasineqartup politiit suleqatigai, eqqartuussissuserisoq oqarpoq. Taanna oqaluttuarpoq, Bråthen-ip paasigaa qanoq iliorsimalluni, sukumiisumillu inunnik tallimanik toqutsinini pingasunillu ikiliinini politiinut oqaluttuarisimallugu.
Angut pisissimik qarsunillu sakkulik pillugu siullermik pingasunngormat nal. 18 qaangilaaraa kaleriisoqarpoq. Angutip politeeq sulinngitsoq, Coop Extra-p pisiniarfiani ikilerpaa. Politeeq tuimigut ikilerneqarpoq.
Politiit aggersarneqartut aamma qarsunik igeriaqattaarfigineqarput.
- Politiit Coop Extra-p iluani pasineqartoq naapeqqaarpaat, tassanili aallaasinnaasimanagu, politimester Ole B. Sæverud NRK-mut oqarpoq.
Tassani politiit qarsunik marlunnik igeriarfigineqarput, taanna nangippoq.
Politiit aggersakkat eqqoranaveeqqutissaminnik allanillu isumannaallisaatissaminnik utaqqineranni, angut pisiniarfimmiit qimaasimavoq. Qanoq iliorsimanersoq suli iluamik ilisimaneqanngilaq.
Aatsaat akunnerup affaa qaangiuttoq pasineqartoq politiit naapeqqippaat, kalerrisaarummillu igeriaarlutik. Angut tassani pinaagani tigusaavoq. Pisiniarfimmiit qimaanerminiit akunnerup affaata ingerlanerani, arnat sisamat angullu ataaseq – taamarmik 50-it 70-illu akornanni ukiullit - toqussimavai.
Pisissip qarsullu saniatigut allanik aamma angut sakkoqarsimavoq, sakkulli suunersut poltiit nalunaarutiginngilaat.
Politiadvokat Ann Iren Svane Mathiassen Norge-mi TV 2-mut oqaarpoq, saassussineq pilersaarusiorneqarsimarpasinngitsoq.
- Saassussinerup pilersaarusiorneqarsimanissaa ilimagissallugu tunngavissaqanngilaq. Pisiniarfimmi pisut aamma toqoraanermut pissutaasimagunanngillat, taanna Norge-mi TV 2-mut oqarpoq.
