Norge CO2-mik aniatitsiunnaavinniarpoq
Norgemi silaannarmik mingutitsumik CO2-imik aniatitsinerup ukioq 2030-mi unitsinneqarluinnarnissaa Norgemi naalakkersuisunngortut suliniutigilerpaat.
Allattoq Jaaku Lyberth
CO2-mik aniatitsineq ukioq 2020-mi 40 procentinik annikillisinneqarnissaa naalakkersuisut suliniutigivaat, 2030-milu CO2-mik aniatitsiunnaavinnissaq siunniunneqartoq, aviisimi berlingskemi allaaserineqarpoq.
Silap pissusaa pillugu Københavnimi ataatsimeersuarnermi decembarimi pisussami, nunat tamat akornanni isumaqatigiissusiortoqarnissaa, Norgep anguniagaanut aallaaviulluinnassasoq, Norgemi naalakkersuisut nalunaarput.