Inuussutissarsiutit

Norge aalisarneq pillugu isumaqatigiissuteqarfigigaat

Aalisarnermut Naalakkersuisoqarfik aalisagartassiissutit pillugit Nunatta sanilerisaanik ukiup taamaalinerani isumaqatigiissusiortarpoq.
Assi © : Royal Greenland
Allattoq Karsten Sommer
decembarip 10-at 2015 06:37
Nutserisoq Mads Lynge

Savalimmiormiut Russillu qanittukkut isumaqatigiissusiorfigineqarput, Nunattalu Norgellu akornanni aappaagumut 2016-imut aalisartagassiissutinik isumaqatigiissusiortoqaqqammerluni.

Aalisarnermik inuussutissarsiutillit Aalisarnermullu Naalakkersuisoqarfiup isumaqatiginninniarnerit inerneri nuannaarutigaat.

Aalisartut Nunatsinneersut Norgep imartaani saarullinnik, kullerinik saarulliusaanillu ukioq mannatut amerlatigisunik aappaagu aalisarsinnaassapput.

Tamanna pissutaalluni aalisartut Nunatsinneersut Barentshavimi saarullinnik 3500 tonsinik pisaqarsinnaassapput, kullerinillu 900 tonsinik pisaqarsinnaassallutik, saarulliusaanillu 700 tonsinik pisaqarsinnaassallutik.

Taamaattoq Norgemiut Tunumi qaleralittassaat 100 tonsinik ikilineqarput, nataarnartassaallu 60 tonsinik ikilineqarlutik, akerlianillu tinguttuunik 200 tonsinik Tunumi aalisagartassinneqarlutik.

Norgep aappaagumut aalisagartassiissutit pillugit isumaqatigiissusior-figineqarneratigut, Nunatta nunanik allanik ukiumoortumik isumaqatigiissusiortarneri ukioq manna naammassineqarput, isumaqatigiissutigineqartullu Aalisarnermut Naalakkersuisoqarfimmit iluarisimaarneqarlutik.

 

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk