Nordönip usingiarneqarnera unnugu naammassineqassagunarpoq
Royal Arctic Linep imarpik ikaarlu umiarsuaata Nordönip Nuummi usingiarneqarnera unnugu naammassineqarnissaa naatsorsuutigineqarpoq.
Nordön sapaatip-akunnerani kingullermi imarpikkoortilluni silapilussiorpoq, usiilu illikarlutik, containerillu usigineqartut annertuumik ajoquserlutik.
Umiarsuup usingiarneqarnera ilungersunarsimavoq sivisullunilu. Usit maskiinallu uppikaatitersimapput, containerit arlallit ajoqusingaatsiarsimapput, naliginnaasumillu usilersortarfianit kivinneqarsinnaasimanatik.
Containerit usilersortarfimmi allerni inissisimasut immamit ajoquserneqarput, tanki oqimaaloqutaasoq putusimammat usillu ajoquserlugit.
Usit containerimiittut ajoqusersimasutut isikkoqanngikkaluartut ajoqusersimasinnaapput, taamaattumillu nassiussanik
piginnittut qinnuigineqarput sumiiffimminni nassiussaleriffik saaffigeqqullugu tassani ajoqusersimasut pillugit nalunaarusiortoqarniassammat, Royal Arctic Line nalunaarpoq.
Containerit ilai ajoqusersimangitsut maannakkut sinerissami illoqarfinnut ingerlanneqarput, sinnerilu ulluni qaninnerni isumagineqassapput.