Nordsømi uulia Danmarkip milliardinik isertitaqarfigaa

Tuluit Hollandimiullu uuliasiorfissuat, Shell, Nordsøp ilaani Danmarkimut atasumi uuliasiornermini koruuninik milliarderpassuarnik isertitaqarpoq. Tamanna ullormut saqqummersartumi Børsenimi ullumi allaaserineqarpoq.
Allattoq Louise M. Kleemann
juulip 07-at 2008 07:04

Shell Danmarkimi nunap ataaniittut pillugit piginneqatigiiffimmi DUC-imi – Dansk Undergrunds Consortium-imi – piginneqataanermigut ukiut qulit ingerlaneranni 50 milliardi koruuninik isertitaqartoq naatsorsuutit takutippaat.

Nordsømi uuliasiorneq pillugu isumaqatigiissut 2003-mi isumaqatigiinniutigineqarmalli akileraarutit qaffariangaatsiarsimasut naatsorsuutini aamma takuneqarsinnaavoq.

Akileraarut 1990-ikkunni 30 procentiusimasoq, 2003-mi akileraaruteqarpianngeriarluni kingorna 60 procentimiilersimavoq, ukiunilu kingullerni marlunni 70 procentimiissimavoq.

Shell siorna 19,5 milliardi koruuninik sinneqartoorpoq, taamaalillunilu Danmarkip nunaata karsianut 13,5 milliardi koruuninik akileraarluni.

Nordsømi isumaqatigiissut tunngavigalugu Danmarki ukiut tallimat ingerlanerani 46 milliardi koruuninik iluanaaruteqarpoq, Shellilu akileraarutit peereerlugit 30 milliardi koruuninik iluanaarluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq