Nordsømi eqalussuaqarnasoraat
Puisi kimmarterujussuarsimasoq taama pasitsaassinermut pissutaavoq, puisi taanna 30 centimeterit sinnerlugit annertutigisumik kimmartissimavoq. Taanna Tuluit Nunaanni Sheringhamimi umiarsualivimmi nassaarineqarsimavoq.
- Kimmartinneri pilattuutaasatut isikkoqarput, puisilu naamigut kimmartissimavoq, eqalussuillu kiisineri taama isikkoqartarmata Nordsømi eqalussuaqarnissaa pasitsaapparput. Nutaarsiassaqartitsivimmut BBC Newsimut taama oqarpoq annanniummik umiatsiaatilik, Chris Taylor, puisimik kimmarterujussuarsimasumik naammattuuisoq.
Tamannali pissutigalugu eqalussuarnit saassunneqarnissarput ernummatigisariaqanngilarput, aamma silap pissusaata allangoriartornera suaartaatigisariaqanngilarput, Grenåmi Kattegatcenterimi pisortaaneq, Jørgen Møller, oqarpoq.
- Imaq suli taama kissartigilinngilaq. Eqalussuillu qaqortat immami nillataartumiikkusunnerusarput, Jørgen Møller aviisimut Politikenimut oqarpoq.
Eqalussuit qaqortat 7 meterisut angitigilersinnaapput, tonsinillu marlunnik oqimaassuseqalersinnaallutik.
