Nordisk Råd sullisilersorpoq
Nunat Avannarliit Siunnersuisoqatigiiffiata ukiormanna ataatsimiinnerani pingaarnertut oqaluuserineqartussat marluk taakkuussapput. Norgemi juulip 22-anni peqqarniisaartoqarneratigut inuit 77-it toqutaanerisa kingorna, inuiaqatigiit nunani avannarlerniittut ammasuunissaat oqaluuserisassanut ilanngunneqarpoq.
- Stoltenberg erseqqilluinnartumik nalunaarpoq tamatuma Norge-mi demokrati sakkortuumik eqqoraa, nunallu siuttui isumaqatigiipput nalunaarutigineqassasoq Nunat avannarliit tassaasut najugaqarfigissallugit toqqissisimanartut qanoq eqqarsartaaseqarneq apeqqutaatinnagu, Nunanik avannarlernik suleqateqarnermut Naalakkersuisoq Palle Christiansen oqarpoq.
Nunani avannarlerni siunnersuisooqatigiit suleriaaseraat oqaaseqaasiortarneq aammalu nunat assigiinngitsut naalakkersuisuinut inassutinik tunniussaqartarltuik. Palle Christiansenip oqarnera malillugu Nunanik avannarlernik suleqateqarneq Naalakkersuisunit assut pingaartinneqarpoq.
- Naalakkersuisut pimoorlugu apeqqutit Nunanut avannarlernut tunngasut suliarisarpaat. Sapaatip akunnerani siuliani Inatsisartunut nassuiaammi sammisat assigiinngitsorpassuit eqqartorneqarput, Palle Christiansen oqarpoq.
Nunat Avannarliit Siunnersuisoqatigiiffiata ataatsimiinnissaa marlunngorpat ualikkut pisortatigoortumik ammarneqassaaq, taamaattorli ataatsimeeqattaarnerit ullumi ataasinngornermiit aallartinneqariissapput. Nunat Avannarliit Siunnersuisoqatigiiffiata nersornaasiineri pingasunngorpat unnukkut tunniunneqassapput, sapaatillu akunnerata ingerlanerani, nunanut avannarlernut kulturikkut festivaleqartitsinermi Ting-imik taaneqartumi, Nunat Avannarliit kulturiinut tunngasunik Københavnimi aaqqissuussisoqartassaaq.
Nunat Avannarliit Siunnersuisoqatigiiffiata ataatsimiinnerani Nunarput sinnerlugu peqataasussat tassaapput Andreas Uldum aamma Akitsinnguaq Olsen, Kim Kielsenimut sinniisussatut peqataasussaq. Tamatuma saniatigut Naalakkersuisuni ilaasortat periarfissaq iluatsillugu Danmarkimi ministerinngorlaat ilasseqatigisinnaassavaat, matumanilu Nunatta Danmarkillu akornanni apeqqutit pingaarutillit oqaluuserineqassallutik. Nunat Avannarliit Siunnersuisoqatigiiffiata ataatsimiinnera KNR-imit malinnaaffigineqassaaq.
