Nordisk Kulturfond Kalaallit Nunaanni
Nunani avannarlerni inooriaatsit , kulturillu assigiinngisitaarput. Aningaasaateqarfiullu pingaarnertut sulliassaraa nunat assigiinngitsut kulturikkut pigisaat nunani avannarlerni assigiinngitsuni takutsinneqarlutik saqqummersinneqarnissaat.
-Aningaasaateqarfimmi siulersuisut Kalaallit Nunaanni ataatsimiinnissarput siunniussimavarput ilaatigut siunertaralugu Kalaallit Nunaannit ilisimaneqarnerulernissarput. Kalaallimmi Nunaanninngaanniit kulturimut tunngasunik suliniuteqartunik qinnuteqartartut amerlanngillat, uagullu kissaatigaarput Kalaallit nunani avannarlerni kulturiminnik takutitsinermikkut peqataanerusariaqartut. Kalaallimmi kulturiat asseqanngilluinnarpoq, nunanilu avannarlini nunat allat tamanna pissarsiaqarfigilluarsinnaavaat, Nordisk kulturfondimi direktøri Karen Bue taama oqaluttuarpoq.
Nordisk kulturfondimik aningaasaliiffigineqarsimasunik maanna Nunatsinni pisoqarpoq. Tassalu qitinnermik aallaaveqartumik suliniut, kiisalu suliniut meeqqat inuusutullu kulturiannik takutitsisuusoq. Meeqqat inuusuttullu kulturiannik takutitsineq nunaqarfinni pisussaavoq, innuttaasunullu kulturikkut misigisaqartitsissalluni.
- Qitilluni suliniummut OuterVisionimut 150.000 koruuninik tapiissuteqarsimavugut. Unalu sapaatip akunnera Ilulissaniipput, unnugulu naggammeerlutik takutitsisussaassapput. Sapaatillu akunnera tulleq Nuummukassapput. Nuummiinnerminni qitsittariaatsit assigiinngitsut pillugit workshoppeqartitsissapput. Suliniutip siunertaraa inuusuttut qitik atorlugu arlaannik takutitsisinnaanissaannik angusaqarniarneq, Karen Bue oqarpoq.
- Suliniut ”Norden Rundt – Kunst fra iskanten ” NAPA suleqatigalugu pilersipparput. Tamatumani containerit meqqat inuusuttuaqqallu eqqumiitsuliaannik imersimasagut nunaqarfinni takutsinneqassapput. Sumiiffinnilu saqqummersitsiviusuni meeqqat inuusuttullu eqqumiitsuliornermik piginnaasatik misilerarsinnaajumaarpaat. Nuannaarutigeqaarput suliniutip tamatuma inoqarfinni minnerusuni misigitsinneqarnissaa, tassa sumiiffinni naliginnaasumik eqqumiitsulianik saqqummersiviusanngitsuni. Eqqumiitsuliat Kalaallit Nunaanni takutsinneqareerpata Islandimi, Savalimmiuni, Finlandimilu aamma saqqummersinneqarumaarput, Karen Bue oqaluttuarpoq.
Læs mere om projekterne: http://www.katuaq.gl/da/arrangementer/teater_og_dans/teater__danseprogram/outervision
http://www.napa.gl/index.php?option=com_content&view=article&id=102&Itemid=95&lang=da
