Nordic Orionip Canadap avannaatigut sullualukkut angalanera naammassivoq
Umiarsuaq uuliamik assartuut danskit pigisaat Nordic Orion Canadap avannaatigut sullualukkut angalanera Canada-mi persuarsiutigineqarpoq.
Nordic Orion umiarsuarni uulianik assartuutini siullersaalluni sullualukkut angalavoq.
Umiarsuup sullualukkoornermini Canadami inatsisit maleruagassallu malillugit ingerlaarsimammat nuannaarutigineqarpoq.
USA taamaaliunngisaarnarsimasoq Marianne Stenbæk-imit Canada-mit ilanngutassiamini eqqavaa, nunat allamiummi maanna ima isumaqarput sullualuk tassaasoq nunat tamat imartarigaat, ingerlaarfigineqarsinnaasorlu Canada-mi akuersissumik peqqaarani.
Sullualuk Canadap imartaatut isigineqassasoq Canadamit kimigiisissutigineqartuarpq nunallu inatsisai malinneqartariaqartut erseqqissaatigineqarluni.
Umiarsuup uuliamik assartuutip Nordic Orion-ip Sullualukkoorneratigut, umiarsuit sullualukkoortartut Canada-mit nakkutigineqannginnerat isiginiarneqalerpoq, umiarsuit angallavigisaat taanna naammattumik akisussaassuseqarluni nakkutigineqannginnera angallavigineqarnerulerneratigullu avatangiisitigut kingunerisinnaasai isiginiarneqarati.
Umiarsuit sikusiortartut arfinillit arfineq pingasulluunnit Sullualukkoorsinnaasut sananeqassasut ministeriunerup Harperip 2007 -imi nalunaarutiginkuuvaa, soorluttaaq umiarsualivinnik sanasoqassasoq nalunaarutigalugu mannali tikillugu sanasoqarsimanani.
Soorluttaaq timmisartunik nutaanik ilisimatuussutsikkut misissuinerni annaassiniarnermilu atorneqartartussanik peqalissasoq nalunaarutigineqarpoq aamma taakkua piviusunngorsimanatik.
Allatut oqaatigalugu, umiarsuit uuliamik assartuutit Sullualukkut ingerlaartillugit Canada-mit pinngitsaalineqarsinnaanngillat Canada-p inatsisai maleruagassaalu ataqqissagaat, soorluttaaq umiarsuit sullualukkoortut alapernaarsuiffigineqarsinnaanngillat ajutoortoqaraluarpallu ikiuigasuartussanik piareersimasoqanngilaq aamma Sullualummi avatangiisit ajornartorsiortinneqalerpata piareersimasoqarani.
Taamaattumik danskit umiarsuaata uuliamik assartuutip Nordic Orion-ip Sullualukkoornera, Sullualukkut umiarsuartigut angalanermi ajornartorsiutit isiginiarneqalerput tassami umiarsuartigut tassuna angalaneq Canada-mut umiarsuarnullu tassunna ingerlaartartunut pingaaaruteqaleraluttuinarmat.