Nordatlantens Bryggemi meeqqanut sapaatiuppat isiginnartitsisoqassaaq
Meeqqat tallimat qulingiluallu akornanni ukiullit Københavnimi Nordatlantens Bryggemi sapaammi februaarip qulingani misigisaqalaavissornissaminnut periarfissaqarput. Isiginnaartitsisartoqatigiit ”Valborgs Mave” isiginnaartitsissut Sassuma Arnaa takutissavaat. Isiginnaartitsissut inuit Sassuma Arnaanik oqaluttuatoqaannik aallaaveqarpoq sammineqartullu tassaapput piummartussuseq, ajukkunneq ataqqinninnerlu.
Allattoq Peter Troelsen, Simon Uldum
februaarip 08-at 2013 07:38
Isiginnaartitsisartoqatigiit Valbymeersut Inuit oqaluttuatoqaat ullutsinnut nallersuuppaat, sammineqartummi ullutsinni suli atuupput. Nutaarluinnartullu isiginnaariat isiginnaartitsissummut, "Valborgs Mave"-p immap iluani isiginnaartitsissutitut taasaannut, peqataanissamut periarfissinneqassapput.
Isiginnaartitsineq Nordatlantens Bryggemi Københavnimi Strandgademiittumi sapaammi februaarip qulingani nal. 14.00 pissaaq. Meeqqanut iserneq 75 kr.-eqassaaq, inersimasullu meeqqatik peqatigalugit akeqanngitsumik isersinnaapput.
