NORA suliniutinut nutaanut siunnersuusiortoqarnissaanik kajumissaarivoq

Suliniutinut ukiumut 500.000 koruunit tungaannut nalilinnik siunnersuusiortoqarsinnaavoq qinnuteqartoqarlunilu, ukiunullu pingasunut atuuttussanut qinneqartoqarsinnaammat katillugit 1,5 millionit koruuninik qinnuteqartoqarsinnaalluni.

NORA-p ukiunut tulliuttunut talimanut iliuusissatut pilersaarusiaa 2012-imeersoq tunuliaqutaralugu siunnersuusiortoqarsinnaavoq. Nunap immikkoortuani suliniutissat assigiinngitsut suliniuteqarfigineqarsinnaassapput, periarfissarsiuunneqarsinnaassallutillu.

Nunap immikkoortuani inuussutissarsiutitigut piorsaasoqarnissaa pillugu qinnuteqartoqarsinnaavoq, matumani aalisarnerup pingaarnersatut inissisimanera eqqartorneqarluni. Nioqqutissanik nutaanik piorsaanissaq, tunisassioriaatsit nutaat, pisuussutillu suli iluaqutigineqanngitsut iluaqutigineqarsinnaalernissaat pillugu siunnersuusiortoqarsinnaassalluni.

Takornarialernermut, nunalerinermut nukissiuutinullu ataavartunut tunngasunut aningaasaliisoqarnissaanut aamma qinnuteqartoqarsinnaavoq.

Attaveqarnermut angallassinermullu tunngasunut aningaasaliisoqarsinnaanissaanut aamma qinnuteqartoqarsinnaavoq, inuiaqatigiinnguanut nunap immikkoortuiniittunut, isorliunerusunilu najugalinni aningaasat kaaviiaartinneqartut amerlisarneqarsinnaanissaat aamma anguniagaalluni.

NORA REGION CONFERENCE 2013-imi immikkut sammineqartumut, tassa Atlantikup Avannaani tusagassiuutit - tusagassiuutillu Atlantikup Avannaaniittut, nanginneqartussanut suliniutit NORA-p 2014-imut iliuusissatut pilersaarutaanut attuumassutillit aamma aningaasaliivigineqarsinnaapput.