NORA-p siulittaasortaava Nunatsinneersuuvoq
Tina Jensen Inuussutissarsiornermut, Aatsitassanut Suliffeqarnermullu Naalakkersuisoqarfimmi immikkoortortaqarfimmi pisortaavoq, siornatigullu takornariaqartitsinerup iluani sulisimalluni.
Najugaqarfeeqqani ineriartortitsinissaq pinngortitallu pissarititaanik piujuaannartitsinissaq tunngavigalugu atuinissaq sulissutiginiagaasa ilagaat. Assersuutigulu najukkani tunisassiorfiit amerlanerusut pilersinneqarnissaat najukkanilu nerisassianik takornarianut tuniniaasarnissaq sulissutiginiarpaa.
Nora nittartakkamik nutaamik aamma saqqummersitseqqammerpoq. Nittartakkami noraregiontrends.org-imi nunat atlantikup avannaaniittut pillugit nutaarsiassat kisitsisitigullu paasissutissat atuarneqarsinnaapput.
Assersuutigalugu kuultip gassillu pinngortitameersup akii, nunani atlantikup avannaaniittuni suliffissaleqineq kiisalu Issittumi uuliasiorluni qillerinissat pillugit immikkut ilisimasallit mianersoqqusinerat.
Nittartakkap Noraregiontrendsip Kalaallit Nunaat tamaat, Island, Savalimmiormiut Norgellu sineriaa pillugit paasissutissanik imaqarpoq.