Nomami nererusuttorpassuit inniminniipput

Neriniartarfimmut Nomamut neriartorniarlutik inuit tusintilikkuutaat nerrivimmik inniminniiniarlutik misiliisaraluarput, ulikkaarussaaqqappulli.
Allattoq Apollo Jeremiassen
apriilip 29-at 2010 06:46

Nunarsuatsinni neriniartarfiit pitsaanersaattut NOMA ataasinngormat toqqagaavoq.

Toqqagaareernerata kingorna inuit 100.000-t nerrivimmik inniminniiniarlutik misiliigaluarput. Nutaarsiassaqartitsivik Politiken.dk. allappoq, NOMA-mi inniminniisarfik atorunnaarallarsimasoq. NOMA-mi nerisassiarineqartartut ilaatigut Kalaallit Nunaata pissarititaannik igaajusarput.

- Inniminniiniartut amerlagaarmata uppernanngigajapporluunniit. NOMA-mi pisortaq Peter Kreiner aviisimut oqarpoq.

Neriniartarfittut pitsaanerpaatut toqqagaanngikkallarmat, ullormut inuit 600-t 700-llu akornanni ullormut nerrivimmik inniminniisaraluarput, maannali tassa amerleriarujussuarput.

Qarasaasiaq inniminniinermut atortoq maanna allinialerpaat, inniminniiniartunut malinnaasinnaaniassammat. Inniminniiniallu nunarsuarmit tamaneersuupput.

- Colombiamiut radioatigut apersorneqaqqammerpunga, pisortaq Peter Kreiner oqarpoq. Allaakkat tusintit missaaniittut ullormut akisalerlugit taassuma aamma oqaatigaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq