ASSIT Noma nunatta kujataanut paasisassarsiortoq

Nomami igasut marlunngornermi inuussutissalerinermik ilinniarfimmut Narsamiittumut Inuilimut pulaarput. Uanilu puisip qanoq aggorneqartarnera kalaallillu nerisassaataat qanoq mamartuliarineqarsinnaanerat takutinneqarpoq.

Inuilimi iffiornermik ilinniartitsisup, Jens Høegh Andersenip tamanna oqaluttuaraa.

- Atuartuutitta ilaat peqatigalugit aqissiliorlutillu puisiliorput.

Nunarsuarmi igasutsialattut ilisimaneqartumik Rene Redzepitut ittumik Narsamut ullut tamaasa tikeraartoqarneq ajorpoq tamanna Inuilimi atuartunut immikkut misigisatsialaavoq.

- Atuartut uagullumi pissangaqaagut. Tikeraarnerat pissarsiaqarfigeqaat, ilinniartitsisoq oqarpoq.

Nunarsuarmi neriartarfinni pitsaanerpaatut arlaleriarluni qinerneqarnikumit Nomamit aallartitat Kalaallit Nunaannut tikinnerminnit videoliaq nittartakkatigut attaveqaqatigiittarfimmut ikkussimavaat. Uani takuneqarsinnaavoq mittarfimmi naasunik tigoqaapallattut.

Nomallu neriartarfiani nerisassat kalaallit akuutissaataanik akoqarsinnaalluarnerat takuneqarsinnaavoq.

- Tikiusaatigut alutorisorujussuuaat. Alutornaatigeqaat, Jens Høegh Andersen oqarpoq.

Nomap neriniartarfia nutaat 2017-ip naajartornerani ammassasoq naatsorsuutigineqarpoq.