Noma nunarsuarmi siuttunngoqqippoq

Neriniartarfik Noma nunarsuarmi neriniartarfiit pitsaanersaattut sisamassaanik toqqagaavoq.
apriilip 29-at 2014 08:25

Neriniartarfiup, nunat atlantikup avannaamiut illuutaanni Nordatlantiske Bryggenimiittup, Nunatta Danmarkimi Sinniisoqarfiata aamma inissisimaffigisaani, sassaalliutigisartagai immikkuullarissut soorlu eqqusamik toastiliat, nersussuup neqaa aserortigaq aapasoq uniaalunnik akullugu, immuk kukkarnaasaliaralugu issortitaq saarulliullu tinguanik akuugaq allarpassuillu nerisassianik kusanasaakkanik immikkut soqutigisallit nunarsuarmit tamaneersut alutorsaatigilluarsimarpasippaat.

Nerisassiat pillugit atuagassiaq Restaurant Magazine neriniartarfiit nunarsuarmi pitsaanersaannik ukiut tamaasa toqqaasarpoq.

Noma ukiuni pingasuni siuttooreerluni Spaniami neriartarfimmit siorna qaangerneqaraluarpoq.

Noma igasunit Claus Meyerimit René Redzepimillu 2003-mi tunngavilerneqarpoq "nunallu avannarliit igaffiannik nutaaliaasumik" taasaminni nerisassiassanik nunatsinneersunik atuilluartarsimapput.

Neriniartarfiup ukiut qulit matuma siorna ammarneqarnerani Nomap nunat avannarliit igaffiannik nutaaliaasumik takorluugaata qularineqarnera igasuunerup aamma eqqaasitsissutigaa.

- Taamani neriniartarfik taagorneqarpoq sælknepperen (puisinik kujannittartoq), Redzepi neriniartarfiup aterusersorneqartarsimanera pillugu oqaaseqarami ilaatigut taama oqarpoq.

Naliliisartut 900-t nunarsuarmi neriartarfiit sorliit allattorsimaffimmut ataqqinaataasumut ilanngunneqassanersut aalajangertarpaat. Inassuteqartartullu tassaapput tusagassiortut, igasut, neriniartarfiutillit nerisassiornerlu pillugu tusagassiortut nunarsuarmit tamaneersut. Allattorsimaffik neriniartarfiit nunarsuarmi pisortatiguunngitsumik pissartanngorniuffigisartagaattut aamma isigineqarpoq.