Nobelip nersornaasiuttagaa Finlandimiumut tunniunneqassaaq

Nobelip nersornaasiuttagaa finlandimiumut ukioq manna tunniunneqassaaq. Finlandimi præsidentiusimasoq, Naalagaaffinnilu Peqatigiinni eqqissineqarnissaa pillugu isumaqatigiissitsiniartartoq, Martti Ahtisaari, nunarsuaq tamakkerlugu akerleriissuteqarnernik unitsitsiniarluni suliniuteqarnini pillugu nersornaatisissaaq.
Allattoq Louise M. Kleemann
oktobarip 10-at 2008 12:29

72-inik ukiulik, Martti Ahtisaari, Finlandimi 1994-imiit 2000-ip tungaanut præsidentiuvoq, Naalagaaffinnilu Peqatigiinni ukiorpassuit diplomatiulluni, soorlu Naalagaaffiit Peqatigiinnit Kosovomut immikkut aallartitatut sulisimalluni.

Nobelip nersornaasiisarneranut ataatsimiititaliap Ahtisaarip nersornaatisinissaanut tunngavilersuutigaa, Martti Ahtisaari nunavissuarni arlalinni akerleriissuteqarnerit ukiut qulikkuutaat pingasut sinnerlugit ingerlaneranni aaqqiivigisarsimammagit. Suliniutai pissutaallutik nunarsuarmi eqqissinerusoqarpoq, inuiaqatigiillu Alfred Nobelip anersaavata aqqani akaareqatigiinnerulerput, ataatsimiititaliaq allappoq.

Namibiap kiffaanngissuseqalernissaanut aallartisarneq, Indonesiami provinsimi Aceh-imi, Irlandimi Avannarlermi, Asiap qeqqani Afrikas Hornimilu ajornartorsiutit eqqissiviilliornerillu aaqqiivigineqarneranni Martti Ahtisaari suleqataalluinnarsimavoq, Irakimilu ajornartorsiutit aamma unitsinniarsarisimallugit.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq