Nobelip eqqissinermut nersornaat Colombiamiunut pigitippaa
Nobelip eqqissinermut nersornaasiuttagaa, Colombiamiumut Juan Manuel Santosimut ullumi tunniunneqarpoq.
- Eqqissinermut nersornaasiuttagaq uannut pingaarnerpaajunngilaq kisianni Colombiami eqqissisoqarnissaa pingaarnerutippara Juan Manuel Santos nersornaasiinermut atatillugu taama oqarpoq.
Juan Manuel Santos ukiut arlaqartut matuma siornatigut Colombiami præsidentiunerata nalaani Nobelip eqqissinermut nersornaasiuttagaanik nersornaaserneqartussaalluni paasigaluaruniuk upperisimassanngikkaluarpaa.
Juan Santos nersornaatip tunniunneqarneranut atatillugu Oslop Rådhusiani spaniamiusut oqalugiarami taama oqarpoq.
- Ukiut arfinillit matuma siornatigut Colombiamiuusugut takorloorsinnaanngilarput sorsunneq unitsinneqassasoq ukiummi 50-it ataallugit sorsuttuni ilungersorsimavugut.
Colombiami pikititsiniaqatigiinnik Farcimik eqqisseqatigiinnissamik isumaqatigissuteqartoqarpoq, tamannalu pissutigerpiarlugu Nobelip komiteanit Santos nersornaaserneqassasoq aalajangerneqartoq.
Nobelip nersornaasiuttagaa Oslomi Santosimut tunniuneqarluni persuarsiortoqarnerani Norgemi kunngi, nulia, kunngissakkullu peqataapput.
