Nobelimik nersornaasigaq soraarsitaavoq

Nobelip eqqissinermut nersornaasiuttagaanik nersornaaserneqarsimasoq nalunnginneqarluartoq, Muhammad Yunus, aningaaserivimmit annikitsumik akiligassiisartumit, Grameen Bankimit, soraarsitaasimavoq.
marsip 02-at 2011 11:36

Yunus nammineq aningaaserivimmik taassumannga aallartitsisuuvoq, tunuarnissaalu politikerit qaammatini arlalinni piumasarisimavaat.

- Yunusip aningaaserivimmi pisortaanertut akisussaaffimminit ingerlaannartumik soraarnissaa aaqqiivigaarput, aningaaserivimmi Grameenimi siulittaasoq, Muzammel Huq, nutaarsiassaqartitsivimmut AFP-mut oqarpoq.

Yunus Muhammed aningaaserivimmi 2000-imili pisortaaneruvoq. Grameen akileraarutitigut peqqusersusaartarnerarlugu Norgemiit pisimasuimmik aallakaatitami oqaatigineqarmalli ministeriunerup Sheikh Hasinap naalakkersuisuisa Yunus Muhammed malersugarilerpaat.

Yunus kukkussuteqannginnerartuarsimavoq. - Sheikh Hasina 2007-imi iluatsitsinani partiiliorniarsarigaluaramili malersugarilerpaanga, oqarpoq.

70-inik ukiulik Yunus piitsunut, qularnaveeqqusiinngikkaluarlutik, aningaasanik 1976-imili taarsigassarsisitsisalerpoq, Nobelillu eqqissinermut nersornaasiuttagaanik 2006-imi nersornaaserneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq