Nobel-ip nersornaasiuttagaa Bangladeshimiumut
Nobelip eqqissineq pillugu nersunnaasiuttagaa Bangladeshimiumut Muhammed Yunusimut aningaaserivimmullu Grameen Bankimut ukioq manna tunniunneqarpoq. Muhammed Yunusip Grameen Bank 1976-imi tunngavilerpaa. Muhammed Yunus Grameen Bankillu piitsut aningaasarsiornerat inuttullu ineriartornissaat kiisalu piitsutut inuujunnaarnissaat qulakkeertarsimagaat Nobelimi nersornaasiisartut kommissioniata nalunaarutigaa.
Nunaatillit innuttaasullu allat piitsut aningaasamininnguanik atukkertarsimavaat sivisuumik erniakitsumik taarsersorusaagasaannik.
Grameen Bankip piitsut piitsuujunnaarusuttut aningaasaliiffigissallugit immikkut suliniartuuvoq. Isertitakitsut ikittunnguanik ileqqaagaqartut aningaasaleerpiarsinnaanngitsullu ajornartorsiutaasarput. Taamatullu atukkiisarnermi aallariarnissaminnut periarfissinneqartarput allanillu aningaasanik atukkiisartut taamaalillutik ingalassimasinnaavaat. Nobelip nersornaasiuttagaanik kommissioni taamatut toqqaanermigut tupaallatitsivoq. Muhammed Yunus aamma Grameen nersornaaserneqarnissaminnut innersuunneqarsimagunanngillat. Norgemiut 10 million koruunii, nersornaasiinermi tunniunneqartartut avillugit Muhammed Yunusimut aningaaserivimmullu Grameenimut Oslomi decembarip quliganni tunniunneqassapput.
