NLP attaveqaqatigeeriatsinik allanngortitsivoq
Jenny Lyberth, Elisabeth Sikemsen aamma Mette Knudsen, arnaapput misilittagartuut pingasut, ilaatigut meeqqanik sullissinermik ukiorpassuarnik tunuliaqutaqartut, sulinerminnullu atatillugu pikkorissarnernut assigiinngitsorpassuarnut peqataasarsimasut, NPL Practioneritullu pikkorissarnertik taakkunannga pitsaanerpaatut oqaatigaat.
Nammineq attaveqaqatigeeriaaserisaq pitsaasumut saatsinniassagaanni pitsaasullu tungaanut ingerlaqqinniassagaanni, nammineq pissusilersuutigisartakkat siulliullugit allanngortinnissaat oqaluttuarineqarput.
- Pissusilersuutigisartakkama ilagisartakkannullu attaveqaqatigeeriaatsima allanngortinnerisigut uannut anaanatut, nuliatut suleqatitullu susassareqatigiinnernullu allanut tunngatillugu pitsaasumik sunniuteqarput, Elisabeth Sikemsen iliuuseqannginnermini avatangiisiminiittunik namminerlu misigissutsiminik naalaaqqaarnissaminut ilinniarsimanerminik iluarisimaarinnittoq oqaluttuarpoq, siornatigummi periataartarluni pissuseqarsimagaluarami.
Perorsaasut pingasuusut Nuummi sullissivinni marlunni ulluinnarni sulisuupput. Jenny Lyberth Elisabeth Sikemsenilu Ungaami sulisuupput Mette Knudsenilu atuareersunut paaqqinnittarfimmi Nanumi sulisuulluni. Taakku pingasuullutik ataatsimoorutigaat NLP-ip iluani ilinniarnermik kingorna ulluinnarni suliaminnut allaanerusumik isiginnittaaseqalersimagamik.
-Inuiaqatigiinni amerliartuinnartut katataanissaat pinngitsoortikkumagaanni meeraq qitiutillugu sulisoqarnissaa pingaaruteqartupilussuuvoq. Ilisimasat amerlanerusut pigilernerisigut tunniussaqarnissamut nukissaqarnerusoqalersarpoq, inuiaqatigiinnilu katataasut amerlanerulissanngippata meeqqanik perorsaaneq pillugu inuiaqatigiinni oqallittoqarnerunissaa pingaaruteqarpoq, Jenny Lyberth, Ungaami ulluinnarni aqutsisuusoq oqaluttuarpoq.
