Nivissat Danmarkip Radioani erinarsortartut Namminersornerullutik Oqartussat Kalaallit Nunaannut qaaqqusimavaat, Namminersornerullutik Oqartussat ukiunik 30-nngortorsiornissaminnut, namminersulivinnissattalu eqqunneqarnissaanut atatillugu, Danmarkip Radioani erinarsortartut qaaqquneqarput, juunip ulluisa 17-iannit 26-ata tungaanut. Illoqarfinni taaneqareersuni sisamani taakkunani, tassa Qaqortumi, Nuummi, Sisimiuni Ilulissanilu, tusarnaartitsisoqassaaq, illoqarfinnilu taakkunani nivissat 15-iniit 20-nut ukiullit erinarsoqataanissaminnut periarfissinneqarput.
Sisimiuni apriilip ulluisa 18-ianni misilitsittoqassaaq, tusarnaartitseqataasinnaasut sisamat ujartorneqassallutik. Tamanna Nipilersornermut Ilinniarfimmi pissaaq. Danskit erinniaata ”En yndig og frydefuld sommertid”-ip versia siulleq atorneqassaaq, taavalu nammineq qinigaq ataaseq.