Nivi Air Greenlandimut saaffiginnippoq, billetsit utertikkusullugit. Tamannali Air Greenlandip itigartippaa. Assi: Privat

Nivip billetsini utertissinnaanngilaa: Ilungersunaqaaq

Nivi inuit allat assigalugit aasamut pilersaarutini malillugit feriersinnaanngilaq.

Nivi ilaquttanilu aasamut Danmarkiliartussaagaluarput.

Coronavirusilli ajornartorsiortitsinera pissutigalugu angalaniarani aalajangerpoq.

- Uagut utertikkusukkaluarpagut oorit, nunatta iluani angalaannarusukkaluaratta, Nivi Therese Heilmann oqarpoq.

Nunatsinniit ataasinngornermi angalasoqaqqissinnaalerpoq. Tamanna coronavirusimik sapaatit akunnerit arlallit tunillatsittoqaqqissimannginneranik pissuteqarpoq.

Air Greenlandip itigartippaa

Avammulli angalasut peqquteqavitsigatik nunatsinnut uteqqissinnaanngillat.

Nivi taamaammat Air Greenlandimut saaffiginnippoq, billetsit utertikkusullugit.

Tamannali Air Greenlandip itigartippaa. Timmisartuutileqatigiiffik massakkorpiaq iliuuseqarsinnaanani Nivimut ilisimatitsivoq. Air Greenlandip oqartussat akissuteqarnissaat utaqqeqqaarniaraat, Nivi ilisimatitsivoq.

AAMMA ATUARUK Namminersorlutik Oqartussat: Nunatsinniit angalasoqaqqissinnaalerpoq

- Paasisagut malillugit oorit tamakkerlugit utertissinnaannginnatsigit kisimi lufthavnsafgiftertaannai utertitsissinnaallugit. taanna oqarpoq.

- Aallarniaraluarpugut juulip arferngani nunatsinnullu uterluta juulip 30-ani.

Nivi billetsinik Takussiusunik qaammatit pingasut matuma siorna pisivoq.

Takuss bilitsitiupput siumut utimullu aaliangersimasut akikitsut. Takuss bilitsit ilaqutariinnut tulluartuupput, naalungiarsuit 0-1 utoqqaassusillit 90%-inik akikillisaaffigineqartarput meeqqallu marlunniit aqqqaneq marlunnut ukiulinnut 50%-mik akikillisaaffigineqartarlutik.

- Uumitsannarpoq assut

Taamatullu pisoqarnera Nivimut toqqissisimananngilaq.

- Uumitsannarpoq assut, ilungersunarluni iliuusissaaleqinarlunilu. Tusaaneqarusunnaraluarpoq, Nivi Therese Heilmann oqarpoq.

Taassuma katillugu 9.569 koruunit annaariaannaavai.

- Soorlu tusarniaavigineqarnerusinnaagaluarpugut ukua billetsersinikut, qanorluunniit billetsit allanngortissinnaanngikkaluarpataluunniit, uagummi pisuunnginnatta nualluut taanna atuutilermat.

KNR-ip Air Greenland ippassaq attavigigaluarpaa. Air Greenlandili ullumikkut akissuteqarsinnaanani ilisimatitsivoq. Ullumikkulli pingasunngornermi akissuteqarsinnaallutik oqaatigalugu.

Isummersuutit