Niviarsiaraq aqqanilinnik ukiulik unnuaq tamaat ujaarineqareerluni nassaarineqarpoq

Nuummi niviarsiaraq aqqanilinnik ukiulik, tammaaneqartoq unnukkut aqqaneq qaangerlugu tanneq pingasunut nalunaarutigineqarpoq. Nuummi innuttaasut arlallit ujaasinermi peqataapput.
Niviarsiaraq ujaarineqartoq ullaap tungaa qulinut ajunngitsoq nassaarineqarpoq.
novembarip 11-at 2020 15:11

Niviarsiaraq ippassaq unnukkut aqqaneq qaangeraa tammaaneqartoq nalunaarutigineqarpoq. Taasuma angajoqqaavi, politiinut attaveqarput.

- Angajoqqaat panitsik tammaallugu nalunaarput. Uagullu politiit unnuami ujarleqataagaluarpugut, nassaarinngilarpulli, politiit pigaartuisa naalagaat, Malik Sandgreen KNR-imut oqarpoq.

Inuit nittartakkakkut attaveqaqatigiittarfiisigut Facebookkimi quppernermi Nuuk Borger Infomi, niviarsiaqqap anaanaa ikiortissarsiorluni allappoq. Taanna panimi arferngup qeqqanut angerlarnissaa utaqqisimagaluarlugu angerlarsimanngitsoq, paninilu takuneqarsimappat attavigeqquvoq.

Nuummi innuttaasut nammineq kajumissutsiminnik ullaap tungaa Qinngutsinni, Nuussuarmi Nuummilu ujaaseqataalerput.

- Nalunaaqutaq qulip missaani innuttaasumit sianerfigineqarpugut, niviarsiaraq ujaarineqartoq Nuuk Centerimi nikorfaqatigiginni. Erngerluta ornigukkatta niviarsiaraq ujaarisarput nassaarivarput, angajoqqaavilu attaveqarfigalugit, Malik Sandgreen oqarpoq.

- Suliaq politiiniit naammassivarput, pigaartut naalagaat oqarpoq.