Niviarsiaraq 15-inik ukiulik pinerluuteqarsimasunut inissiisarfimmiitinneqartoq

Niviarsiaqqap pinerluuteqarsimasunut inissiisarfiannut inissinneqarnera pissusissamisuunngitsoq, illersuisuata Juaannannguaq Jensenip oqaatigaa:

- Isumaqaratta naleqquttuunngitsoq, aamma piliarisimasai aallaavigalugit ukioqqortussusialu aallaavigalugu isertitsivimmiinnissaa aamma naleqquttuunngitsorigatsigu, illersuisoq Juaannannguaq Jensen oqarpoq.

Niviarsiaraq kujataaninngaanneersoq Sisimiuni ulloq unnuarlu inissiisarfimmi inissinneqarsimasoq arlaleriarluni tillianniartarsimasutut pasineqarluni, ataasiarlunilu persuttaasimasutut pasineqarluni ukioq manna novembarip 27-ani tigusarineqarpoq, eqqartuussivimmilu aqaguani novembarip ulluisa 28-anni sassartinneqarami eqqartuussaanissami tungaanut sivikinnerpaamik decembarip 19-iata tungaanut tigummigallagassanngortinneqarnissaa aalajangerneqarluni.

Niviarsiaraq decembarip pingajuanili pinerluuteqarsimasunut inissiisarfianniitinneqarsimavoq.

Niviarsiaqqap naleqqunnerusumut inissinneqarnissaa aallaqqamulli aalajangerneqarsimasoq, illersuisuata Juaannannguaq Jensenip oqaatigaa:

- Massakkut paarineqarneranut atatillugu piumasarineqarnikuuvoq aalajangiunneqarnikuullunilu surrogatanbringelse atorlugu inissinneqassasoq, tassa anstaltip avataanut assersuutigalugu angerlarsimaffimmut naleqquttumut inissinneqarnissaa piumasarineqarsimavoq, eqqartuussaanissami tungaanut, Juaannannguaq Jensen oqarpoq.

Niviarsiaqalli inissinneqarfissaanik kommunerisaa suli isumaginnissinnaasimanngimmat illersuisuata tamanna isornartoqartippaa, niviarsiaqqallu pinerluuteqarsimasunut inissiisarfianniitinneqarninni aliasuutigaa, allaallumi iluamik sinissinnaajunnaarsimalluni, soorlu aamma inissiisarfimmiitinneqarninni toqqissisimanartinngikkaa:

- Inissinneqarnerata sivitsornerani inuttaata soorunami nuannarinngitsorujussuuaa aliasuutigeqalugulu, illersuisoq Juaannannguaq Jensen oqarpoq.

Niviarsiaqqap kommunerisaa oqaaseqartinniaraluaratsigu iluatsissinnaasimanngilarput.