Niviarsiaraq 14-inik ukiulik Danmarkiliaanneqartoq

Niviarsiaraq 14-inik ukiulik, Sarfannguit eqqaanni illuaqqami ippassaq qaartoortoqarnerani uutiterujussuartoq ullumi Danmarkiliaanneqarpoq.

14-inik ukiulik ippassaq Nuummukaanneqarpoq, Danmarkimullu ullumi ingerlateqqinneqarluni.

Camilla Palmann, Kalaallit Nunaanni politiit sinnerlugit tusagassiisartoq taama ilisimatitsivoq.

Niviarsiaraq 13-inik ukiulik alianaqisumik ajutoortoqarnerani ajunaarpoq.

AAMMA ATUARUK Qaartoqarnerani niviarsiaraq 13-inik ukiulik ajunaartoq

Inersimasoq niviarsiaqqat ilagalugit illuaqqamiittoq suli tuparujussuaqqavoq, inersimasorlu politiinit suli killisiorneqarsinnaasimanngitsoq Camilla Palmannip KNR-imut oqaatigaa.

Nakorsaq toqusunik misissuisartoq, pinerluttulerinermullu tunngasuni misissuisartoq, Danmarkimeersut, ajutoortoqarnera misissuiffigiartussagaat taassuma aamma ilisimatitsissutigaa.

Taakku Sisimiunut marlunngorpat tikinnissaat naatsorsuutigineqartoq Camilla Palmannip oqaatigaa.

Illuaqqami marlunnik gassiisiveqarsimasoq politiit ilisimavaat, gassiisiveqarfimmilu qaartoortoqarsimanissaa ilimagineqarluni.

Qaartortoqarnera politiinut ippassaq ulloqeqqalersoq kalerriutigineqarpoq, qanigisaasullu, peqqinnissaqarfimmeersullu politiillu illuaqqamut akunneq qaangiummat apuullutik.