AWG 2018 Niviarsiaqqat snowboardimik unamminerini annilaarnartumik pisoqartoq
Snowboarderluni unammisartoq kuultinnannissaminullu ilimagineqartoq 13-inik ukiulik Ajaana Rosing Kleemann, Snowboard Crossimi ullumi finalertoqarnerani orlunermi kingorna peqataaqqissinnaajunnaarpoq.
Finalimi sisutsiaannarlutik qangattarfissaq siulleq tikillugulu unammisut imminnut qanillivallaartoorput Ajaanalu unammisaminit sakatsikkami orluvoq.
Kalaallit snowboardertartut sungiusaasut, Rune Lennert, orlusoqarnerata kinguninngua oqaloqatigaarput, Ajaana Rosing Kleemannillu finalimi sakatsilluni orlunerarpaa, qitini seeqqunilu annersillugit.
- Tassa ajorpasinngilaq, eqqissisimavoq, Rune Lennert KNR-imut oqarpoq.
Ilanngullugu oqaatigaa Ajaana Rosing Kleemannip unammeqqinnissaa ilimanarunnaartoq.
AAMMA ATUARUK Ajaanap kuultit tamakkerniarpai
Nakorsamit misissorneqartoq
- Massakkut nalunartut pillugit qitikkut annialaarmat takulaarniarpaat, taava ilagissuara Arnarlu. Skadestuemukaatilerpaat nakorsamut takutilaarlugu. Kisianni ajunngilaq, Kalaallit Timersoqatigiit Kattuffianneersoq Muusa Ostermann-Søholm, KNR-imut taama oqarpoq.
Muusa Ostermann-Søholmip aamma oqaatigaa ukioq manna Arctic Winter Gamesertoqarnerani annerusumik ajoqusertoqarsimanngitsoq. Timersortartulli akornanni napparsimasoqalaarsimavoq, maannali aaqqissimanerarpai.
Ajorani angerlareerpoq
Kalaallit Timersoqatigiit Kattuffianni (GIF) generalsekretæri Nuummiittoq Carsten Olsen KNR-imit attaveqarfigaarput.
- Annersimavoq aamma ernumanngilaq, aamma qiimavoq, GIF-imi generalsekretæri Carsten Olsen KNR-imut taama oqarpoq.
- Ajaana ajunngilaq takutikkamiuk ajornerusumik susoqanngilaq. Angerlareerpoq iniminut, Kalaallit Timersoqatigiit Kattuffiat taama ilisimatitsivoq.
