Niviarsiaqqat inersimasunut: Meeqqat pujortartut inertersigit !

Meeqqat pujortartarnerlu 310707 unnuk kso neg

Qanittukkut aaqqissuisoqarfitsinni allagarsivugut assut eqqarsaatissiisunik. Niviarsiaqqat Else aamma Emma arfineq-pingasunik ukioqarput, imalu saaffiginnissutaat imaqarpoq.

- Oqaluttuariniarigaana niviarsiaqqat nukappiaqqallu arfinillit qulit 14-illu akornanni taamaallaat ukioqaraluarlutik pujortaattut Elselu takugatsigit. Pinnguartarfimmiissinnaanngilagulluunniit. Putsumit silagut aallaramik. Meeqqat taama mikitigisut pujortaqqusaanngillat, aamma nuanninngilaq pujortartut isigalugit. Tipeqaarmi, Emma oqaluttuarluni aallartippoq.

Saaffiginnissutiminni aamma oqaluttuaraat, niviarsiaqqat ilaat inersimasunik takkuttoqarnissaanik marsertuusimasut, arnaq taavalu angutit marluk saneqqukkaluarput kisiannili annersinneqarnissatsinnik ersigatta oqaatiginngilagut, Else Emmalu allapput, nangillutillu:

- Allappugut pissutigalugu inersimasut oqarfigerusukkatsigit meeqqatik pujortartannginnissaannik oqarfigissagaat. Meeraqatitillu ima oqarfigerusuppaat.

-Pujortartarunnaartariaqarput, cigaretsi peqqinnanngilaq. Aamma maajunnarpoq. Meeqqat mikisut pujortartassanngillat. Inersimasut kisimik. Uagut pujortartarusunngilagut. Pujortartarneq ulorianarmat. Emma arfineq-pingasunik ukiulik oqarpoq.

Nuummi miljøarbejderit pisortaat oqarpoq, sulinerminni meeqqat mikisut pujortarniakujuttartut akuttunngitsumik naammattoortaritik. Pingaartumik pisiniarfeeqqat silataanni naammattuugassaasarput, iliuuseqarfigiuminaattarnerarpaalli.

- Oqaluunniaraangatsigit ilaat qimaasarput, aamma ilisimavarput meeqqat imminnut sunneqattaattartut, Jakob Fencker Noahsen oqarpoq.