Niviarsiaqqat amerligaluttuinnartut nakuuserniartarput
Niviarsiaqqat amerligaluttuinnartut nakuuserniarsimasutut eqqartuunneqartalersimapput. Aviisi ullormut saqqummersartoq Politiken taama allappoq.
Niviarsiaqqat 15-it 19-illu akornanni ukiullit 55-it nakuuserniarsimasutut 1990-imi eqqartuunneqarput, 2005-imilu 313-iusimallutik. Tassa arfinileriaammik amerlisimallutik.
Danmarkimi naatsorsueqqissaartarfiup kisitsisaatai naapertorlugit tamanna paasinarsivoq.
Niviarsissat inuusuttut inissinneqartarfiannit angerlartinneqarsimasut 2001-imi arfineq-pingasuusimariarlutik siorna 61-iusimapput, tassa qulingiluariaammik amerlisimallutik.
- Niviarsiaqqat aamma ajornartorsiuteqartartut nalunngilarput, siornatigulli nakuuserniartarsimanngeriarlutik maanna nakuuserniartalersimapput, Ballerup Kommuneani siunnersorti Astrid Heindorff oqarpoq.
Inunnik isumaginninnermut siunnersorti Helsingørip kommuneaneersoq, Herdis Bergmann, oqarpoq niviarsiaqqat nukappiaqqanik ilaarsiniartalersimasut.